Si stu core me se stregne,

si stu core me se regne,

si me sento malamente

a sta sempe 'mmiez' 'a gente,

si nun trovo 'nu ricetto

e si 'a notte, dint' 'o lietto

m'arrevoto scujetato,

si 'o ricordo d''o passato

e 'a paura 'e stu dimane

ma fa tennere li mmane

p'alluccà e pe' dice: "Basta!"

si nu juorno nun m'abbasta

pe' levarme 'a dint' 'o core

sta menesta d'odio e ammore,

si sta capa nun se cagna...

me ne fujo 'ncopp' 'a montagna!

M'arrevoto dint'a neve,

sott''o ghiaccio vaco a beve

e alliscianno erreve e sciure

io me sento 'nu criaturo

ca a la mamma soia sta 'nzino

e 'o profumo doce e fino

d' 'e capille suoie s'addora

e..cchiù niente l'addulora!

Tutto è luce, tutto è bello

e me faccio comm'auciello:

ruciuleo dint' 'o vallone,

volo 'ncopp' 'a nu raione,

guardo sempe cchiù luntano,

cielo e terra tengo 'n mano

e che musica int' 'o core:

è 'o silenzio cantatore...